ភ្នំពេញ៖ តាងនាមថ្នាក់ដឹកនាំ និងមន្ត្រីរាជការនៃក្រសួងយុត្តិធម៌ ព្រមទាំងចៅក្រម ព្រះរាជអាជ្ញា ក្រឡាបញ្ជី អាជ្ញាសាលា និងមន្ត្រីនៃសាលាជម្រះក្តីគ្រប់ជាន់ថ្នាក់នៅទូទាំងប្រទេស លោកឧបនាយករដ្ឋមន្រ្តី កើត រិទ្ធ សូមសម្តែងនូវការអបអរសាទរ ប្រកបដោយមនោសញ្ចេតនារីករាយ និងសូមសម្តែងនូវសេចក្តីគោរពដ៏ខ្ពង់ខ្ពស់ជូនចំពោះ សម្តេចកិត្តិសង្គហបណ្ឌិត ក្នុងឱកាសដ៏មហានក្ខត្តឫក្សនៃខួបចម្រើនអាយុវឌ្ឍនមង្គលរបស់ សម្តេចកិត្តិសង្គហបណ្ឌិត ក្នុងជន្មាយុ គម្រប់ ៧១ឆ្នាំ ឈានចូល ៧២ឆ្នាំ ដែលនឹងចូលមកដល់នៅថ្ងៃព្រហស្បតិ៍ ១១កើត ខែស្រាពណ៍ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៥ ខែសីហា ឆ្នាំ២០២៤ ខាងមុខនេះ។

ក្នុងឱកាសដ៏មហាប្រសើរថ្លៃថ្លានៃខួបចម្រើនអាយុវឌ្ឍនមង្គលនេះ យើងខ្ញុំទាំងអស់គ្នាសូមសម្តែងនូវ កតញ្ញូតាធម៌ និងការគោរពស្ញប់ស្ញែងដ៏ជ្រាលជ្រៅជូនចំពោះ សម្តេចកិត្តិសង្គហបណ្ឌិត ដែលមាន គុណបំណាច់យ៉ាងធំធេងចំពោះ “ជាតិ សាសនា ព្រះមហាក្សត្រ” ជាពិសេស សម្ដេច កន្លងមក បានខិតខំប្រឹងប្រែងលះបង់យកអស់ទាំងកម្លាំងកាយចិត្ត និងប្រាជ្ញាស្មារតី ក្នុងការចូលរួមចំណែកការពារ រាជបល្ល័ង្គ និងរបបរាជានិយមអាស្រ័យរដ្ឋធម្មនុញ្ញ, ការការពារអធិបតេយ្យជាតិ និងបូរណភាពទឹកដី, ព្រមទាំង ការចូលរួមចំណែកដឹកនាំប្រជាជាតិកម្ពុជាកន្លងមក ឱ្យទទួលបាននូវសុខសន្តិភាព ស្ថិរភាព ឯកភាពជាតិ និង ការអភិវឌ្ឍជាតិលើគ្រប់វិស័យ ក្រោមមគ្គទេសក៍ដឹកនាំប្រកបដោយគតិបណ្ឌិតដ៏ខ្ពង់ខ្ពស់បំផុតរបស់ សម្តេច អគ្គមហាសេនាបតីតេជោ ហ៊ុន សែន “បិតាស្ថាបនិកសន្តិភាពរបស់កម្ពុជា”។

ឆ្លៀតក្នុងឱកាសដ៏សិរីមង្គលប្រសើរថ្លៃថ្លានេះ យើងខ្ញុំសូមលើកហត្ថប្រណមបួងសួងដល់គុណបុណ្យ ព្រះរតនត្រ័យ គុណកែវទាំងបី និងវត្ថុស័ក្តិសិទ្ធិក្នុងលោក សូមតាមជួយថែរក្សាការពារ ប្រទានពរជ័យ បវរសួស្តីជ័យមង្គល និងវិបុលសុខគ្រប់ប្រការជូនចំពោះ សម្តេចកិត្តិសង្គហបណ្ឌិត ព្រមទាំងបុត្រធីតា ចៅប្រុសចៅស្រី សូមសមប្រកបតែនឹងពុទ្ធពរទាំងបួនប្រការគឺ អាយុ វណ្ណៈ សុខៈ និង ពលៈ កុំបីឃ្លៀងឃ្លាតឡើយ៕